أرض

من وحي مقال لشربل بعيني:

اختلفوا خطوط الطول وخطوط العرض

وكل مين بدو موقفو يصفي فرض

ولما الزمن وقف بآخر هالحياة

ضاعوا الخطوط وما بقي غير الأرض
**
رح قولها تالناس فيها يفكروا

ويستخلصوا معناتها ويتذكروا

الزايدين العقل عم يتناقصوا

والناقصين العقل عم يتكاتروا
**
الايد للي رفعت هالدني بتدبيرها

بتقوم وقت الضيق في تدميرها

العالم بتاكل بعضها لما البطون

من الجوع بدها تزقزق عصافيرها
**
هالأرض يللي مسودني طول وعرض

وعم ترتجي من الشمس تا تاخد قرض

فيها بشر عالموت آخدها العمى

وعملوا الرذيله شرع فرضوها فرض

وهودي البشر لما بيروحوا عالسما

رح يخربوها متل ما خربوا الأرض
**